Shkalla e suksesit të klinikës ka ardhur duke u rritur ndër vite dhe tashmë konsiderohet e shkëlqyer. Ky sukses pasqyron përvojën dhe cilësinë e Ekipit Embriologjik dhe përkushtimin dhe aftësitë e mjekëve, infermiereve dhe personelit të administratës. Si për IVF, ashtu edhe për ICSI, ne e tejkalojmë mesataren kombëtare për çdo grupmoshë grash deri 41 vjeç.

Embrionet që nuk transferohen, mund të ngrihen nëse kanë cilësi të përshtatshme. Në kohën e transferimit të embrionit, embriologu do të diskutojë me ju për cilësinë e embrioneve për transferim dhe për çdo embrion të mbetur do t’ju këshillojë nëse i përmbush` kriteret për ngrirje. Ne i ngrijmë mesatarisht embrionet për rreth 25% të pacientëve.

IVF (Fertilizimi In Vitro) është metoda, përmes së cilës një numër i lartë spermatozoidesh (të përgatitur) vendosen në një epruvetë ku janë vendosur vezët dhe sperma lihet që të notojë vetë drejt vezëve. Sperma dhe vezët lihen së bashku gjatë natës dhe kontrollohen për fertilizim të nesërmen në mëngjes.

ICSI (Injeksioni i Spermës në Citoplazëm) është metoda, përmes së cilës një spermatozoid i vetëm injektohet në një vezë nga një embriolog. Kjo teknikë mund të përdoret në qoftë se përqendrimi apo lëvizshmëria e spermës janë të ulëta ose në qoftë se me IVF është arritur më parë një fertilizim jo i mirë.

Shumë çifte vazhdojnë marrëdhëniet intime gjatë trajtimit dhe për shumicën e rasteve, kjo nuk përbën asnjë problem. Ka raste kur marrëdhëniet e pambrojtura është e mira të shmangen, por kjo do të sqarohet gjatë trajtimit, pasi ndryshon nga një çift tek tjetri.

Një rast kur mund ta këshillojmë këtë është para marrjes së një kampioni sperme për qëllime analizimi ose trajtimi. Është e rëndësishme të shmanget ejakulimi për disa ditë, pasi kjo ndikon në rezultat, si në numrat e spermatozoidëve, ashtu edhe në lëvizshmërinë e tyre.

Numri më i lartë i spermatozoidëve dhe lëvizshmëria e tyre më e mirë shihet zakonisht tek burri, pasi ai të mos ketë kryer marrëdhënie nga 2 deri në 7 ditë. Abstenimi për më gjatë se kaq mund të rrisë numrin e spermatozoidëve, por bie raporti i atyre që ende “notojnë”. Nga ana tjetër, ejakulimi çdo ditë mund të rrisë lëvizshmërinë e spermës, por numrat kanë për të qenë më të ulët. Prandaj, rregulli 2 deri në 7 është kompromisi më i mirë mes përqendrimit dhe lëvizshmërisë.

Ne e planifikojmë testin e shtatzanisë nga dita e 10-12 pas transferimit të embrionit.

Ne rekomandojmë që t’i merrni gjërat shtruar për pjesën tjetër të ditës pas transferimit, por aktivitetet rutinë mund t’i rifilloni ditën e nesërme. Nëse shohim ndonjë rrezik për rritje të hiperstimulimit ovar, do t’ju rekomandojmë reduktimin e aktiviteteve për disa ditë deri në zgjidhjen e situatës së hiperstimulimit.